SETYEMBRE 21, 2023 — Inilabas ng Kawanihan ng Senso ng U.S. ngayong araw ang bilang ng populasyon ayon sa 2020 Senso at ang estadistika ayon sa kasarian at edad para sa 300 detalyadong grupo ng lahi at etniko, pati na rin para sa 1,187 detalyadong tribo at nayon ng Amerikanong Indian at Katutubong Alaskan (AIAN, ayon sa acronym sa Ingles).

Ang mga data na ito ay mula sa 2020 Census Detailed Demographic and Housing Characteristics File A (Detailed DHC-A). Naglabas dati ang Kawanihan ng Senso ng data ng 2020 Senso para sa populasyon ng Hispaniko o Latino at mga pangunahing grupo ng lahi gaya ng Puti, Itim, o Aprikanong Amerikano, Asyano, atbp.

Ang inilabas ngayong araw ay nagdagdag ng impormasyon sa mga detalyadong grupo sa loob ng mga pangunahing kategoryang iyon gaya ng Aleman, Lebanese, Jamaican, Tsino, Katutubong Hawayano, at Mehikano — at sa mga tribo at nayon ng AIAN gaya ng Navajo Nation. Kabilang sa inilabas ang impormasyon tungkol sa mahigit sa 200 detalyadong grupo ng lahi at etniko na hindi nailagay sa talahanayan mula sa mga nakaraang senso.

“Binibigyang-pansin ng mga data na ito ng 2020 Senso ang malawak na pagkakaiba-iba sa kabuuan ng ating bansa,” sabi ni Rachel Marks, pinuno ng Sangay ng Estadistika ng Lahi ng Kawanihan ng Senso. “Nagkaroon tayo ng kumprehensibong larawang ito, salamat sa milyon-milyong tao na sumagot sa senso at nagbigay ng kanilang detalyadong pagkakakilanlan ayon sa lahi, ethnisidad, o tribo, at salamat sa mga stakeholder, mananaliksik, at lider ng tribo na tumulong sa aming pahusayin kung paano namin kinokolekta ang mga detalyadong data na ito.”

Kasama sa mga highlight, inihayag ng Detalyadong DHC-A ang mga pinakamalaking detalyadong grupo sa loob ng mga pangunahing grupo ng lahi at ang populasyon ng Hispaniko. Para sa mga grupo ng lahi, mayroong data para sa parehong populasyon na lahi lang at populasyon na lahi lang o may anumang kumbinasyon. Kinakatawan ng populasyon na lahi lang ang minimum na bilang ng mga tao na tinukoy ang sarili nilang kabilang sa grupong iyon. Kasama rito ang mga nag-ulat ng isang sagot lang, gaya ng Fijian lang. Kinakatawan ng populasyon na lahi lang o may anumang kumbinasyon ang maximum na bilang ng mga tao na tinukoy ang sarili nilang kabilang sa grupong iyon. Kasama rito ang nag-ulat ng isang sagot lang, gaya ng Fijian, at iyong mga nag-ulat ng maraming sagot, gaya ng Fijian at Hapon o Fijian at Itim o Aprikanong Amerikano.

• Ang populasyon ng Mehikano (35.9 milyon) ay ang pinakamalaking detalyadong grupo ng Hispanikong pinagmulan noong 2020, na sinundan ng Puerto Rican sa 5.6 milyon at Salvadoran sa 2.3 milyon.
• Ibinunyag sa detalyadong data ng Hispanikong pinagmulan na umabot ang populasyon ng Kolumbyano (1.3 milyon) at Honduran (1.1 milyon) sa isang milyon sa unang pagkakataon.
• Pinakamabilis ang paglaki ng populasyon ng Venezuelan sa lahat ng detalyadong grupo ng Hispanikong pinagmulan, na halos tatlong beses na mas malaki mula sa 215,023 noong 2010 at naging 605,381 noong 2020.

• Karamihan sa populasyon ng Puti sa bansa ay nag-ulat ng detalyadong Pagkakakilanlan mula sa Europa noong 2020. Ingles ang pinakakaraniwang detalyadong grupo kung saan 25.5 milyong tao ang nag-ulat ng Ingles lang at 46.6 milyon na Ingles lang o may anumang kumbinasyon.
• Sama-samang binubuo ng mga populasyon ng Ingles (46.6 milyon), Aleman (45.0 milyon), at Irish (38.6 milyon) lang o may anumang kumbinasyon ang mahigit sa kalahati ng populasyon ng Puti lang o may kumbinasyon noong 2020.
• Kinakatawan ng mga populasyon ng Lebanese (685,672), Iranian (568,564), at Egyptian (396,854) lang o may kumbinasyon ang halos kalahati ng 3.5 milyong tagasagot na nag-ulat ng Gitnang Silangan at Hilagang Aprikano (MENA, ayon sa acronym sa Ingles) na sagot sa 2020 Senso — ang unang senso na nagsama ng mga halimbawa ng MENA sa isang bahagi na isinusulat ang sagot. Isinasama ang mga halimbawa ng MENA sa kategoryang Puti bilang pagsunod sa mga pamantayang itinakda ng Opisina ng Pamamahala at Badyet ng U.S. noong 1997, na nagkategorya sa mga sagot na MENA bilang bahagi ng kategorya ng lahi na Puti.

• Sa mga tagasagot na Itim o Aprikanong Amerikano, Aprikanong Amerikano ang pinakamalaking detalyadong grupo na iniulat, kung saan 22.1 milyong tao ang nag-ulat ng Aprikanong Amerikano lang at 24.6 milyong Aprikanong Amerikano lang o may anumang kumbinasyon.
• Ang populasyon ng Sub-Saharan na Aprikano lang ay may kabuuang 2.3 milyon at ang populasyon ng Sub-Saharan lang o may anumang kumbinasyon ay may kabuuang 2.8 milyon. Binubuo ng mga populasyon ng Nigerian (604,077), Ethiopian (325,214), Somali (221,043), at Ghanaian (172,558) ang 46.9% ng populasyon ng Sub-Saharan na Aprikano lang o may anumang kumbinasyon.
• Ang populasyon ng Caribbean lang ay may kabuuang 2.1 milyon at ang populasyon ng Caribbean lang o may anumang kumbinasyon ay may kabuuang 2.6 milyon. Binubuo ng mga populasyon ng Jamaican (1.0 milyon), Haitian (1.0 milyon), Trinidadian and Tobagonian (194,364), at West Indian (119,806) ang 91.5% ng populasyong iyon lang o may anumang kumbinasyon. Magkasamang binubuo ng populasyon ng Jamaican at Haitian ang mayorya (80.5%) ngpopulasyon ng Caribbean lang ng bansa noong 2020.

• Sa lahat ng grupo ng Amerikanong Indian at Katutubong Alaska, Aztec (387,122) ang pinakamalaking iyon lang na grupo at Cherokee (1.5 milyon) ang pinakamalaking iyon lang o may kumbinasyong grupo noong 2020.
• Ang Yup’ik (Yup'ik Eskimo) ang pinakamalaking grupo ng Katutubong Alaska lang (9,026) at Tlingit ang pinakamalaking grupo ng Katutubong Alaska lang o may anumang kumbinasyon (22,601).
• Sa mga tagasagot na Amerikanong Indian, Navajo Nation ang pinakakaraniwang iyon lang na sagot na may 315,086 na tao, at Cherokee ang pinakakaraniwang iyon lang o may anumang kumbinasyong sagot na may 1.5 milyong tao.

• Sa mga tagasagot na Asyano, Asyanong Indian ang pinakamalaking grupo na iyon lang (4.4 milyon) at Tsino, maliban sa Taiwanese ang pinakamalaking grupo na iyon lang o may anumang kumbinasyon (5.2 milyon).
• Ang lahat ng Filipino (4.4 milyon), Vietnamese (2.3 milyon), Koreano (2.0 milyon), at Hapon (1.6 milyon) ay may populasyong iyon lang o may anumang kumbinasyon na mahigit sa 1 milyon noong 2020.
• Ang populasyon ng Nepalese ang pinakamabilis na lumaking grupo ng Asyano sa mga may populasyong 50,000 o higit pa noong 2010. Ang populasyong Nepalese lang ay nadagdagan nang 295.5% mula 51,907 noong 2010 at naging 205,297 noong 2020, at ang populasyong Nepalese lang o may anumang kumbinasyon ay lumaki nang 269.0% mula 59,490 at naging 219,503 sa paglipas ng dekada.

• Ang Katutubong Hawayano ay ang pinakamalaking grupo ng Katutubong Hawayano at Ibang Taga-Islang Pasipiko (NHPI, ayon sa acronym sa Ingles) lang (199,880) at grupo na iyon lang o may anumang kumbinasyon (680,442).
• Ang halos lahat ng grupo ng NHPI ay lumaki mula 2010 hanggang 2020. Ang populasyon ng Chuukese lang ay ang pinakamabilis na lumaking grupo ng NHPI lang, nadagdagan ito nang 296.2% at naging 10,500 noong 2020.
• Ang pinakamabilis na lumaking grupo ng NHPI lang o may anumang kumbinasyon ay Papua New Guinean, na nadagdagan nang 249.3% at naging 1,453 tao sa nakalipas na dekada.

• Tinukoy ng malaking mayorya (93.9%) ng 27.9 milyong tagasagot ang mga sarili nila bilang Iba Pang Lahi lang na may Hispaniko o Latinong pinagmulan.
• Kasama rin sa populasyon ng Iba Pang Lahi ang mga taong nag-ulat ng mga terminong “Multiracial at Multiethnic,” gaya ng “Biracial,” sa tanong tungkol sa lahi. Mayroong 467,447 sagot na iyon lang at 1.9 milyong sagot na iyon lang o may anumang kumbinasyon.
• Ang Brazilian ay ang pinakamalaking detalyadong grupo ng Iba Pang Lahi, hindi kasama ang mga sagot na Hispaniko at mga sagot na “Multiracial at Multiethnic” sa tanong tungkol sa lahi. Mayroong 145,180 Brazilian lang at 524,382 sagot na iyon lang o may anumang kumbinasyon.

Dapat gawin nang may pag-iingat ang mga paghahambing ng data ng detalyadong lahi ng 2020 Senso at 2010 Senso at dapat isaalang-alang ang mga pagpapahusay na ginawa sa tanong tungkol sa lahi at sa paraan ng pag-code ng mga sagot ng Kawanihan ng Senso. Gayunpaman, mapaghahambing ang detalyadong data ng Hispanikong pinagmulan mula sa tanong tungkol sa etnisidad sa pagitan ng dalawang senso. Makikita ang higit pang impormasyon tungkol sa mga pagbabagong ginawa sa paraan ng pag-code sa mga detalyadong grupo ng lahi at etniko para sa 2020 Senso sa blog na What You Should Know About the Upcoming Detailed Demographic and Housing Characteristics File A.

May higit pang impormasyon tungkol sa mga detalyadong grupo sa mga kuwento ng America Counts:

• New Population Counts for Nearly 1,500 Race and Ethnicity Groups
• Asian Indian Was the Largest Asian Alone Population Group in 2020
• Detailed Look at Native Hawaiian and Other Pacific Islander Groups
• 3.5 Million People Reported Middle Eastern and North African Descent in 2020

Naglathala rin ang Kawanihan ng Senso ng hindi pa tapos na papel tungkol sa Understanding Counts of Afro-Latino Responses in the 2020 Census, na nagpapakita ng iba't ibang paraan ng paglalagay sa talahanayan ng mga sagot ng Afro-Latino.

Ang Kawanihan ng Senso ay maglalabas ng mga kuwento tungkol sa mga detalyadong populasyon sa loob ng populasyon ng Hispaniko, Amerikanong Indian, at Katutubong Alaska, Puti, Itim o Aprikanong Amerikano, at Iba Pang Lahi sa loob ng mga susunod na ilang linggo.

Makikita ang data ng Detalyadong DHC-A sa interactive na pag-visualize sa Detailed Races and Ethnicities in the United States and Puerto Rico: 2020 Census. Minamapa ng pag-visualize na ito ang pinakamalaki at pangalawang pinakamalaking detalyadong grupo ayon sa estado at county at nagbibigay ng mga listahan ng ranking ng mga detalyadong grupo ayon sa grupo ng lahi o etniko at ayon sa heograpiya.

Makikita rin ang kumpletong hanay ng mga talahanayan ng Detalyadong DHC-A sa data.census.gov. Para sa tulong sa pag-access at paggamit sa data, tingnan ang mga maikling video at patnubay sa paggawa na may mga screenshot sa Detailed DHC-A press kit.

Ang dami ng magagamit na data para sa mga detalyadong grupo ng lahi at etniko at mga tribo at nayon ng AIAN ay nakadepende sa laki ng populasyon nila sa loob ng isang partikular na heograpiya. Ang pamamaraang ito ay nagbibigay-daan sa Kawanihan ng Senso na makagawa ng maraming detalye hangga't posible habang tinitiyak ang mahihigpit na proteksyon sa pagiging kompedensiyal at inilalarawan ito nang mas detalyado sa blog na Data Quality for Detailed Race and Ethnicity Groups and American Indian and Alaska Native Tribes and Villages in the 2020 Census.

Para sa higit pang impormasyon kung paano kinokolekta, binibigyan ng code, at inilalagay sa talahanayan ng Kawanihan ng Senso ang estadistika tungkol sa lahi at Hispaniko o Latinong pinagmulan, i-explore ang mga webpage ng mga pagpapakahulugan sa paksa ng 2020 Senso, ang 2020 Census Detailed DHC-A Technical Documentation, at ang blog na What You Should Know About the Upcoming Detailed Demographic and Housing Characteristics File A.

Makikita ang impormasyon tungkol sa mga pagprotekta sa pagiging kompedensiyal at kawastuhan ng data para sa 2020 Senso sa website na 2020 Census Data Products: Disclosure Avoidance Modernization.

###